الشارع الكنداويدكان الحواديت

حكايات بنات

عزيزاتى البنات والسيدات

اهلا بيكم فى مقال جديد من مقالات حكايات بنات

موضوعنا النهاردة حيكون جرىء وجديد مع انه مش جديد سواء فى مجتمعنا العربى او المصرى او حتى فى مجتمعنا هنا فى كندا

واحنا متفقين ان حكاياتنا من واقع حياتنا وواقع تجاربنا سواء احنا او حكايات ناس عشتها وهم عايشين بالقرب منا عشنا معاهم ظروفهم او حسينا بإحساسهم

ربنا خلقنا ستات ورجالة عشان نكمل بعض , عشان نعمر الكون عشان كدة حنفضل طول عمرنا محتاجين لبعض

الرجالة محتاجين الستات والستات محتاجين للرجالة دى سنة ربنا فى خلقه

لكن فى كتير من الستات او البنات بيتجوزوا او بيخشوا فى علاقات مع رجالة مش بيحققلهم مستوى الطموح او التوقعات الى كانت عندهم فى البداية

فى الاول بترضي البنت براجل مش هو فارس احلامها نتيجة ظروف وعوامل كتير سواء عادات او تقاليد او اجبار علي وضع معين نتيجة ضغوط الحياة وطبعا فى الحالة دى البنات بتلاقى نفسها اما تمشى او تطلق مثلا او انها تسيب العلاقة دى والغريب فى ستات كتير من دول بيفضلوا اعدين مستسلمين مسامحين راضين وراضخين سلبيين

ولما يكون فى ستات راضية بده امال بقى لو عرفنا انه فى ستات راضية تعيش مش مع راجل لا ده مع نص راجل واحيانا مع ربع راجل كمان

دى فى وجهة نظرى طفاسة وطفاسة الرجالة دى واجعة ستات كتير وبصراحة هى لازم توجع الكل

العيب فى الاساس عندنا ايوة العيب عند البنات لما تقبلى تتجوزى راجل وانتى عارفة انه فى ستات تانية بتشاركك فى أحلامه , طموحاته , مستقبله ,واهمهم مشاعره

انا طبعا مش بقصد فى كلامى تعدد الزوجات بس , لا لا ده تعدد المشاعر

انا بتكلم على البنت الى بتبقي عارفة ان جوزها بيخونها او بيكلم واحدة تانية بيحبها او انه كان فى علاقة قبل الجواز او انه كان عنده علاقة زمان مع زوجة قديمة او ماتت او طلقها بس بتربطه بيها اطفال او شغل او مشاعر او قرابة

ومع ذلك الست بتفضل اعدة وراضية ومكملة حياتها معاه 

السؤال هنا بقى !!!؟ 

احنا ازاى بنظلم نفسنا كدة يا بنات !!!!؟

انتى مش حاسة انك بتظلمى نفسك كدة ,, انتى مش حاسة انك حتى بتظلمى الراجل الي معاكي وفى الاخر بنتهم الراجل اه هو الي بيظلم وبيخون وبيدائنا وبياذينا

طبعا انا مش بهاجم البنات والستات وبدافع عن الراجل ابدا …. انا بس بحاول اواجهنا بالحقيقة الي بنحاول نداريها وهى بتوجعنا

انا حقيقى بدافع عننا وعن كل البنات والستات

يا بنات ويا ستات ماتقبليش ان واحدة تانية تشاركك جوزك او حبيبك او صاحبك اى كان المسمى ولا تخشي فى حياة واحدة تانية

ما تقبليش بنص راجل وانتى ليكي كل الحق انك يكون ليكى انسان كامل بكل احلامه وتفكيره ومشاعره

اوعى تقبلى انك تتعاملى مع هذا الاحساس المهين او تقبليه

انتى اغلى وارقى من كدة كتير

ربنا ورسوله عززوكي وكرموكى تقومى انتى تهينى من نفسك وعشان ايه

حكاياتنا كانت عن امرأة واحدة لا تكفى !!!!

هل شايفين كدة فعلا ولا الرجالة مش طفسين وعيناهم مليانة , هل شايفين فعلا امرأة واحدة لا تكفى !!!!؟

رسلونى وابعتولى حكاياتكم وحطوا تعليقاتكم بحرية وطلقائية لو حابين نتعلم منها سوي ولو حابين تشاركونا بيها

استنونى الاسبوع الجاى مع حكاية جديدة من ….. حكايات بنات …… مع تحياتى ( إ . س )

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!
إغلاق