دكان الحواديت

حكايات بنات

فى أول مقال من مقالات حكايات بنات

احب اعرفكم بنفسي انا ( إ . س )

بنت زى كل البنات فى الدنيا عشت حياتي أوقات سعيدة وأوقات حزينة وأوقات كنت بكون فيها فراشة بتطير فوق الدنيا تملاها سعادة

عشت حكايات كتير مرت عليا فى حياتي زى أى بنت وزى كل الناس فيها الحلو وفيها المر .. بس الجميل اني اتعلمت من كل حكاية حاجة جديدة

وأكيد انتم كمان زيي عيشتوا وعندكم حكايات كتير عشتوها واتعلمتوا منها الكتير وعشان كدة خبراتنا بتختلف فى الدنيا

ومعاكم حنحكى ونتشارك فى حكاياتنا ونتعلم منها لانها مش شرط كلها نكون عشناها عشان نعرف مفهومها او نتعلم منها , ممكن ناس قريبة منا عاشتها واتوجعوا منها زى صحابنا او اقربانا فى النهاية لكل حكاية درس بنتعلم منه حاجة مهمة اننا اما نغلط الغلطة دى او لو صادفنا نفس الموقف نعمل ايه

حكاياتنا النهاردة عن الخوف

ياترى الخوف احساس ولا غريزة !!!!؟

يا ترى الخوف تجربة ولا مغامرة !!!!؟

هو ايه معنى الخوف ….. وهل كلنا عندنا نفس معنى الخوف …. لو كل واحد وقف قدام مرايته وسأل نفسه هو ايه الخوف !؟

حيلاقى ردود كتير ومختلفة عن نفسه هو لوحده

يعني الخوف بالنسبالى احساس مش بحبه بس مجبرة عليه فى بعض الاوقات , لكن لما بحسه حيكون أقوى منى برفضه واعمل الحاجة الى خايفة منها تحصل عشان اوقفه

لكن سعات بيكون بردو اقوى منا زى مثلا خوفنا على الناس الى بنحبهم زى اهلنا , امهاتنا , اباهتنا , اخواتنا او خوف الأم على أولادها حتى لو فى حضنها بيكون من الصعب اننا نسكته او نتغلب عليه

خوف لحظة بداية كل حاجة جديدة فى حياتنا

خوف دخول امتحان جديد علينا مع انه فى بعض الاحيان مش بيكون زى ما كنا صغيرين وبنحس بيه , بس خوف المسؤلية نفسها بيكون كبير

خوف الوحدة الى ممكن نحس بيها حتى واحنا وسط ناس كتير

هههههههه او خوفك وانتى بتقدمى القهوة اول مرة لحماتك يوم ما جه الانسان الى حبتيه عشان يتقدملك ويطلب ايدك

او خوفك وانتى بتشيلى اول بيبى ليكي وانتى خايفة عليه حتى من نفسك

خوفنا لحظة فراق اللي بنحبهم هل حنشوفهم تاني ولا دى اخر مرة نشوفهم

خوفنا من مواجهة الحياة بعد رحيل الناس الي كانوا سندنا فى الدنيا

والخوف من بداية حياة جديدة مع شريك حياتك وأد ايه الحياة دى مختلفة عن الى كنتى فكراه

او خوفك وانتى بتركبى مرجيحة عاليا وعايزة تطلعى بيها لفوق لفوق وتطيرى زى الطير

وسعات خوفنا فى لحظة الطيارة وهى لسة طالعة بتشوفى حواليكي ناس مشاعرها واحساسها مختلف الى ماسك فى ايد الكرسى واللى مغمض عينه وضاغط عليها جامد والى ماسك كتاب بيقراه والى نايم ومش حاسس

الخوف فى حياتنا كتير وكتير اوى بس بردو ماعرفناش هو احساس ولا غريزة !!!؟

هو سهل نتحكم فيه ولا التجارب الى بنمر بيها هى الى بتتحكم …. طيب لو مرينا بنفس الحكاية بيكون خوفنا اقل ولا مش بيختلف … هل المرحلة العمرية بتغير فى احساسنا بالخوف

جميل اننا نعترف بالخوف جوانا …. الخوف عمره ما كان ضعف بالعكس الخوف يعنى القوة يعنى اننا لسة جوانا حجات جميلة بنخاف تضيع مننا … معناه اننا لسة جوانا قلب مع كل تجاربنا فى الحياة وقلبنا بتزيد دقاته لما بنخاف

اقفوا قدام المرايا وصارحوا نفسكم ايه الى بيخوفكم ………

هل الوحدة …. هل البعد …. اعرفوا معنى الخوف ايه حتقدروا تسيطروا عليه

رسلونى وابعتولى حكاياتكم لو حابين نتعلم منها سوي ولو حابين تشاركونا بيها

استنونى الاسبوع الجاى مع حكاية جديدة من ….. حكايات بنات …… مع تحياتى ( إ . س )

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!
إغلاق