دكان الحواديت

بطه جدتي .. وبط كندا

د.علياء العطار

يا عِلياء يا بت يا عِلياء تعالي آكلي البط،، طبعا دي جدتي الله يرحمها ،، و لأن أنا من المنصورة كفر ميت الكرماء،،وعندهم في البلد البط بيمشي كده حواليكي ،، طبيعي جداً إنه بط وإنه ممكن يأكل من ايديك ،،، ده العادي ،،، وياما رمينا فتافيت العيش والأرز للبط بتاع جدتي وإحنا قاعدين علي سلم بيتنا في الكفر ساعه العصريه ،، ولأنك مقتنع تماما إن تاكل البط والوز ،، أُختكم بهيه لما وصلت كندا ،،، غير إنها شافت الأرانب والسناجيب بيجروا عادي كده ،، شافت في محطات GO bus تورونتو البط هناك ( معقوله ياربي هنا بط وحمام في الشارع عند الباصات في كندا ) !!!! إفتكرت جدتي وهي بترمي العيش للوز والبط ،، ولأن الدنيا كانت برد ومطر ،، صعبوا عليا وقولت يابت يا بهيه إعطيهم مما أعطاكي الله ،،، وإذ فجأة وأنا سرحانه في ملكوت ربنا ،، ألاقي الشرطه جايه تقولي : Hey stop it’s not allowed to feed them !!! طبعا بلعت السندويتش مش عارفه ازاي ؟ ومابقتشي عارفه أعمل إيه؟؟؟

معقوله ممنوع ليه يعني ،، سافرت عبر الخيال ان اهلي هيدوروا عليا يلاقوني محبوسه بتهمه اطعام البط !!! يا سنه سوخه ياولاد ،،، عديت ومشيت علي خير ،،، رجعت لأولادي اسألهم ليه يعني ممنوع نأكل الباشا البط والحمام الكندي يعني ،، رديت بنتي الكبيره معقوله يا ماما مش عارفه !!!! إحساس الاندهاش الانا حسيته من سوْال بنتي كإني مثلاً من شروط الهجره اني اعرف انه ممنوع أكل البط وانا نسيت مثلا !!! قال ايه : يعتمد علي نفسه وما يفكرش يهاجر !!!! آه يا بهيه آه.

وافتكرت مصر والبلد وقولت آه لو بط كندا يعرف الخير العايش فيه بط مصر ،، كان هاجر علي طول عند بيت جدتي ،، ويستني العيش والأرز هناك ،،، بدل ماهو هنا غلبان ومتبهدل من البرد وممنوع يأكل مالذ وطاب ،، والاهم اوعي تقول لاي كندي انك طابخ بطه،،، هتبقي ضد المحافظة علي البط الكندي ،، أُمال لو عرفوا اننا بنأكل حمام هيعملوا فينا ايه !!! ولا علي بالي باكلهم برده بس بيني وبينهم .

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!
إغلاق