دكان الحواديت

جود مورنينج هانيي..

كتبت د.علياء العطار

 في أجمل يا ناس من إنك تروح تدفع تكيت البراكينج وتلاقي ست حلوة كده ، بتقولك جود مورينينج هانيي، هو في كده !!! افتكرت أيام ما كنت بركن بظهري علي باب المشرحه والاقي عّم محمد الله يرحمه بيقولي صباح الخير يا عسل ، او اتمشى شويه واروح اخد عصير من عند ام هاني وتقولي صباح الورد يا جميلة ياقمره ، او امشي كده وأتمختر في شارع القصر العيني ، ويقولولي ياعسل انت ياعسل مثلا يعني ، هو نفس الهانيي هو هو بس هناك عسل وهنا هانيي.

الحقيقة جيس صديقتي صاحبه الصباح اليومي بتاع ( جود مورينينج هانيي ) فعلا أسعدتني وبقيت أجيب ليها كل يوم شوكولاته وأنا ابدأ اقولها ( جوود مورينينج هانيي) تضحك وتقولي انتي سرقتيها مني ، قولتلها ابدا انتي فعلا بتهوني علي مشواري من مسيساجا لغايه هامليتون كل يوم ، وبتسعديني، قالت لي :

جميل انك تكون سبب في اسعاد ولو شخص واحد ، والأجمل انها بدأت تسألني أنا أصلا منين ؟؟ وبدأت كل يوم أقف معاها ٥ دقايق الصبح أكلمها عن مصر ، وأروح وقت الغدا أخد معي غدا وأقعد معاها ، أحيانا قد ما أقدر ، أكلتها الطعميه ، والفول ، والتونه ، الانبهار اللي كانت فيه فكرتني ببتوع عربيّات الفول في نواصي القصر العيني وكباري بلدنا الجميلة ، واحنا بناكل منهم كده ساعه الصبحيه ، بس مافيش بصل الحقيقه، انا فكرت اجيب كشري او فسيخ بس خوفت من الشرطه الكنديه ، وبقيت هي سعيده قوي اني مهتمه ، وبفكر فيها ، و هل كل المصريين كده ؟؟؟ قولت لها اه كلنا حلوين كده ، وفِي يوم نزلت من غير فلوس وجيت اقولها ادفع بكره بقي زي عّم عبده بتاع الكليه كده ، شككك يعني ، قولت يابت تفتكري في شككك كندي ؟؟ تفتكروا عملت ايه معايا ؟؟

قالت لي ، الهانيي بيقول للهانيي يس شور ، بجد !!! حتي هنا في شككك؟؟؟ لا يا جماعه انا تخيلت ان انا بقيت كنديه ، هو الحقيقه انا هغير الكنديين ويبقوا زيي بهيه. ان شاء الله بقيت تقولها ورايا ، اه و النعمه .

لما طلبت اصورها وشرحت ليها اني هتكلم عنها ، سألتني هل في عرب كتير هيقروا ؟؟ رديت ايوه !!!!! قالت ممكن تقولي لصديقته مني هنا تيجي تسلم علي؟؟ يا مني لو شوفتي جيسي علي كنداوي وقريت كلامي روحي وارمي السلام، ومازالت جيسي بتقولي Good morning Honey وبدأت ادفع يوم ويوم لا ، وخايفه بكره اشتغل معاها سايس بعد الظهر . بس حسبتها لاقيتها مجزيه والله فكره للمستقبل المظلم لينا في يوما ما يا حصبله.

اظهر المزيد

مقالات ذات صلة

‫2 تعليقات

  1. صباح الفل يا جيسي
    أسلوب جميل و ممتع و سلس د.علياء
    في انتظار جديدك

  2. قرأت المقال يا عليا وحسيت انه تلقائي وانه من نوع مقالات محمود السعدني زمان وجوعتيني شوية وياريت تسيبي الست في حالها اوعي تأكليها فسيخ والا سردين والا حيأخذوها على المستشفى واتحملي مسؤليتك يا عسل
    Say Salam (hi)to Jessy, I like when people get to know face of each other directly and naturally without the ugly media that work as guardian to tell people who is good and who is bad, good day honey
    او صباح الخير يا عسل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!
إغلاق