دكان الحواديت

ورد ورد ايفري وير

انا جيهان عبد اللطيف مهندسة ديكور و استيتجر من حوالي ٢٠ سنه كدا وكمان كنت استاذ في جامعة الملك فيصل ودلوقتي هكون معاكم علي موقع كنداوي بمقالات تشرح كل استيلات الديكور والتصميم الداخلي ، هنبدأ الاول بالحاجات الي مش منتشره كتير ، الحاجات الي بنشوفها في المطاعم والكافيهات ونبقي حبينها بس مش عارفين نوصفها لانها معدتش علينا كتير ومعلوماتنا عنها محدودة …. نبدأ النهارده بالشابي شيك ….

ورد ورد ايفرى وير

الشابى شيك …. ايه بقا الشابي تشيك شاك شوك ده ؟؟

اقولك انا ببساطة كده وصحصح معايا علشان تلقط الفكرة… دى مدرسة كده فالديكور وستايل معين معمول فيه احساس بالأصالة والبساطة والشياكة كمان في نفس الوقت و تحس ان قطع الاثاث من الريف الأوربي ، الأقمشة من القطن و الكتان الألوان الخلفية ابيض او ألوان الباستيل البينك الرايق والبيبي بلو والأصفر الفاتح

الاستايل دا المفروض انه معمول علشان يدى راحة نفسية وهدوء اعصاب وبيتمتع بساطة شديدة فالتصميم و بعيد بقى عن التفاصيل الكتير و الجيبسوم بورد والسبوتات والحفر والاويما وغيره من الطرز الزحمة …

ستيل حلو هياخدك لزمن رائع شفته قبل كده فى الافلام الفرنسيه والإنجليزية القديمة، اساسيات الاستيل دا هي الدهانات الفاتحه ابيض بشكل عام وألوان باستيل احيانا في الحوائط وفي الاثاث بنستخدم الخشب الى شكله قديم و يتدهن بالوان فاتحة او المعدن الأبيض احياناً زي ظهر السراير الي فيه زخارف خفيفة. الأرضيات بتكون خشب في الغالب بس ساعات ممكن نستعمل موكيت او السجاد الي بيكون برضك فاتح ، وبعدين المفتاح بقا هو الورد ورد… ورد… ورد … ورد ايفرى وير…. ورد كل الألوان و الاشكال علي خلفيات فاتحة ملاحظه مهمة هنا …. في الوقت الحالي ممكن يتفرش فرش مودرن و تدمجه مع استيل الشابي شيك مفيش مشكله مش شرط الفرش القديم بس لازم تحافظ علي اللون الفاتح والرمادي الفاتح اجدد لون دخل في التحديث للاستيل دا، هتوزع قطع فيها ورد ،بس لازم نوازن و منزودش حاجه علي حساب حاجه ، لا الورد ولا اللوان السادة .

طب أنا مش عايزة أرغي كتير بقى علشان لو لسه مفهمتش حاجة هنتفرج سوا علي صور لستايل الشابى شيك اتفرج وهتفهم قصدي و الاستيل شارح نفسه بنفسه .

وأخيرا لو حد حب يعمل الاستيل دا في بيته يعمل ايه ؟؟؟ بسيطة … لو مطبخ فاتح ادهني الايلاند ازرق فاتح او اخضر فاتح وعلقي نجفة ستيل قديم فوقها وياسلام لو ركبتي فيها وردات خفيفة شيك بس مش ورد بلاستيك

وممكن كمان تعملي مخدات صغيره لكراسي ركن الفطار عليها كرانيش لطيفه أبواب المطبخ ممكن تطبعي عليها بوكيه ورد ناعم داخل إطار خفيف دا لو المطبخ ابيض و فانتتج مش بني و استيل ،

الغرفة العائلية نفس الوضع لو الفرش فاتح ضيفي كوشن فيها ورد و تعملي غطاء للكنب فيه كرانيش وحركات و الستاير كمان فواتح مع كرانيش وورد ( انا بفضل الورد الي حجمة صغير او وسط مع خلفيات فاتحه علشان ميبقاش زحمه )

غرف نوم البنات بينك فاتح في الحيطان و مفرش سرير عليه ورد جميل مع الاباجورة فيها ورد اورجانزا وفيونكات ولو ولاد يبقي الرمادي الفاتح ودرجات الأزرق .

سلام بقا واشوفكم في أستيل جديد قريب ان شاء الله

أى استفسار الرجاء التواصل علي ايميلي الخاص : Amer2gihan@yahoo.com

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!
إغلاق